Жамбыл атындағы Қазақ мемлекеттік филармониясында Ресейдің еңбек сіңірген әртісі, Татарстанның халық әртісі Ахмед Агади мен ҚР еңбек сіңірген қайраткері, Абай атындағы Қазақ мемлекеттік академиялық опера және балет театрының солисі Гүлзат Дәуірбаеваның «Өз елім» атты концерттік кеші өтті. Сазды кеште сахнаның сәнін кіргізген белгілі әншілер Н.Тілендиев атындағы мемлекеттік академиялық фольклорлы-этнографиялық «Отырар сазы» оркестрінің сүйемелдеуімен өнер көрсетті. Оркестрге ҚР еңбек сіңірген қайраткері Дінзухра Тілендиева мен ҚР еңбек сіңірген қайраткері Мүсілім Әмзе жетекшілік етті. Концертте әншілер қазақтың халық әндерімен қатар, қазақстандық және шетелдік композиторлардың жұртшылықтың жүрегіне жол тапқан музыкалық шығармаларын тыңдарманға тарту етті.
– Бұл концерт «Рухани жаңғыру» бағдарламасы аясында өтті. Н.Тілендиев атындағы мемлекеттік академиялық фольклорлы-этнографиялық «Отырар сазы» оркестрі әлемге әйгілі әншілермен бірге өнер көрсетіп, концерт ұйымдастыруды көптен жоспарлап жүрген болатын. Осы ойымызды жүзеге асыру мақсатында дүние жүзіне белгілі сахналарда атақты дирижерлармен қызметтес болған опера әншісі Ахмед Агадимен бірге концерт өткізуді жөн көрдік. Өнерде биік шыңдарды бағындырған, талантымен талайды тамсандырған танымал әнші қасиетті қазақ топырағында туып-өскен дарын иесі. Әлемдік сахналарда өнер көрсетіп жүрген әйгілі жұлдыздармен шығармашылық байланыста болу – оркестріміз үшін үлкен қуаныш, – деді ҚР еңбек сіңірген қайраткері Мүсілім Әмзе.
Сазды кештің қадірлі қонағы болған опера әншісі Ахмед Агади – Мариин театрының және Татарстанның Мұса Жәлил атындағы мемлекеттік опера және балет театрының солисі, Татарстан мемлекеттік сыйлығының лауреаты. 2008 жылы «Ақын махаббаты» спектакліндегі Ғабдолла Тоқай бейнесі үшін «Золотая маска» Ұлттық театр сыйлығының «Операдағы үздік кейіпкер» жүлдесін жеңіп алған. Әлемнің әйгілі сахналарында ән шырқап жүрген опера әншісі қазақ сахнасында өнер көрсетуді армандағанын айтты.
– Бұл менің қазақ сахнасында алғаш рет өнер көрсетуім емес. Осыдан бірнеше жыл бұрын Астана мен Алматының опера театрларында өнер көрсеткен едім. Мен негізі Шымкент облысы, Алғабас ауданы, Жыланды ауылында дүниеге келдім. Есімді білген сәттен бастап қазақ тілінде сөйледім. Қазақ мектебінде білім алдым. 37 жылдан бері дүниежүзілік сахналарда өнер көрсетіп жүрсем де қазақ тілін ұмытқан жоқпын. Ағайын-туысқандарым, жақын достарым Шымкентте тұратындықтан жыл сайын жазда Шымқалаға баруға асығамын. Шартарапты шарлап жүрсең де, кіндік қаның тамған туған жеріңді бәрібір сағынады екенсің. Қазақ сахнасында өнер көрсетуді армандаған едім. Қазақстанда туғандықтан, қазақтың халық әндерін айтқым келді. Туған жерімнің киелі сахнасында өнер көрсету мен үшін үлкен бақыт! – деді Татарстанның халық әртісі Ахмед Агади.